يا أغله كل ناسي ... وتسبيحة أنفاسي
اسمك رفع راسي ... يا مالك إحساسي
يا بسملة عمري ... يرخص إلك نحري
ما أنحني لدهري ... راسخ يظَل ساسي
على دربك ثابت أظل ما زِلِّ القدم
وياك اوجودي أنه ومن دونك عدم
اِقبَلْني بحقِّ الگمر شيال العلم
ویاك اسمي سَجِّله من بين الخَدَم
أريد بخدمتك راسي أرفعه يا ضوه العين
وتسجل فاطمه اِسمي بسجل خدام الحسين
****

تبچیلك اعيوني ... والناس لاموني
لا ما يهموني ... يا كعبة اجنوني
لمصيبتك ناعي ... ومحنيه أضلاعي
ما غَيِّر أطباعي ... وخلهم يِسمعوني
عرش الله الفگدك بچه وأملاك السمه
وما أبچیك اشلون أنا يا بن فاطمه
ما يشفه بگلبي الجرح لو أبچي دمه
الما يبچي لمصيبتك بعيونه العمه
أنا وروحي الحزن بينه ومصابك ما نسيناه
وتظل كل نبضه من گلبي تنادي وا حسيناه
****

ما همني كل لايم ... حزني يظل دايم
شرفني عالوادم ... واقبلني لك خادم
أبچي لكِ اْسنيني ... والموت يلفيني
وما ينتهي اونيني ... أقسم يبن فاطم
لو ساعة موتي تجي ولو جسمي اندفن
أگضي البرزخ هم لطم بعناد الزمن
آنه وكل موتى النجف بثياب الچفن
نتعنى لگبرك مشي ونلطم بالصحن
طفل بعدي وأنه بمهدي توضّه اْلْساني باسمك
وأريدن حتى بالبرزخ يبو اليمه أخدمك
****

ما أحمل اْغيابك ... وأتعنه لَأعْتابك
اتْرد لهفتي اببابك ... من أشتمِ اترابك
اترابك إلي وصفه ... وبي علّتي تشفه
والرايد ايْعِرفه ... خل ينشد أحبابك
عيسى اتشافي كل مرض مَسحة يمنته
بس فطرس ما طيَّبه وظل اْبحسرته
لاچن ساعة مولدك حصّل حاجته
بجناحه بمهدك مسح زالت علته
يسر الاِسم الأعظم بيهْ ابن مريم تكلم
أبد ما أحيا كل ميّتْ لون ما باسمك أقسم
****

ريحانة الهادي ... يا حسرة افادي
صار الحزن زادي ... ومرضاتك امرادي
يا بلسم اجروحي ... يا فلسفة نوحي
مشتاگه لك روحي ... وتسمعها شتنادي
مليت اْمْنِ الفرگه ما ريدن دنيتي
صرت أدعي يا ربي خل تگرب ساعتي
لن گالوا تحضر إلي ساعة دفنتي
اتكحْل اْعْيوني اْبشوفتك يا كُل مُنْيتي
صدگ والموت يلفيني وأطب گبري وتجيني
بعد يا وحشه أحس بيها وحبيبي اتشوفه عيني

أبو كرار البدراوي