عباس يا مشايه ... ينتظر لضيوفه
شيلوها عنه الرايه ... امگطعات اچفوفه
*****
يالله يحباب ... أبو اتراب ..... علي
کل گلب بینه یدگ ... حل وكت العشگ ... دربه لو بي نحترگ
فدوه لحسين ... مجانين ..... نظل
حبه جننه نعم ... عشاگ وخدم ... احنه من دونه عدم

یالله گوموا ینتظرنه الكافل ... يا حسين انصيح يا بو فاضل

إلكم نظل عنايه ... والجدم ملهوفه

حي الله أهل الزود وأهل الغيره ... هذا المشي خله عدونه ابحيره
والد وابن وأم وفتاة ازغيره ... نگصد مشي لحسين من كل ديره

شيعة علي الوفايه ... بالوفه معروفه
*****
جرب الراد ... بالعناد ... وصف
هالشعائر بالبدع ... حاربنا ومنع ... للدرب ياما گطع
منعه ما فاد ... والأعداد ... غدت
چالنجوم ال بالسمه ... كلها امحزمه ... تفدي لحسين الدمه

ما نعوف احنه شعائر ديننا ... ومو مشي نگصد زحف لحسيننا

خل ياخذوها احچايه ... مستحيل انعوفه

ما حاجه نار ولا نجم بالظلمه ... نور الگمر هوه اليوصلك يمه
مو عجبه نوره ايشوفه حتى الأعمه ... والأخرس اتلاگیه يهتف باسمه

واتعنه المسنايه ... بس اندبه وشوفه
****
عينك اتشوف ... بلا اچفوف ... گمر
واگف ابطف كربلا ... يهتف يا هلا ... شيعه يهل المرجله
تسمع اهناك ... للأملاك ... نعي
اتزور عشرين ابصفر ... ما بين البشر ... للحسين وللگمر

احسين ناده يا هلا ابزواري ... والله إنتو وارثين أنصاري

والموت اله شرايه ... وما تهاب اسيوفه

ما تگطع المشايه هذا الممشه ... لا بانفجار ولا مشانق تخشه
احسين اليزوره ايزور الله ابعرشه ... ويردها هاي ازيارتك بالوحشه

بيعه الزياره وغايه ... بالفضل موصوفه
*******
شدوا الحزام ... والأعلام ... ترف
ما يهمنه اليعترض ... من أقصى الأرض ... نمشي ويصيح النبض
خل يلومون ... يگولون ... شرك
نعبد الواحد أحد ... ما نشرك أبد ... والزياره معتقد

احسين وانصاره الجنان اگبورهم ... قربة لله احنا انزورهم

رغم الذبح عنايه ... كل مسية انطوفه

الزار الحسين الله يعظم أجره ... بزيارته وصه النبي والعتره
جابر الأنصاري تعنه القبره ... وقبل ترابه وهل عليه العبره 

واللي يخالف رايه ... غايته مكشوفه

عمر فاروق البدراوي