فرشنا ارموشنا ... لجل أحبابنا
فتحنا اقلوبنا ... بدل أبوابنا
ادخلوها بسلام آمنين
يا هلا بيكم يزوار الحسين
****
مواكب فرقة العباس حيتكم ... يزوار الحسين
هلا بيكم يمن نتمنه خدمتكم ... يزوار الحسين
نعد والله لحظات اعله جيتكم ... يزوار الحسين
تگر العین والعباس شوفتكم ... يزوار الحسين

نحن في سوح الجهاد الموت نحدو ركبه
ها هنا الزائر بالخدمة نجلو كربه

أمس عالساتر ... بدينا اسلاحنا
ابطريق الخدمة ... رفعنا أرواحنا
غصن زيتون وورد في اليدين
يا هلا بيكم يزوار الحسين
*****
هلا ومية هله ابكل خطوه حياكم ... يزوار الحسين
(القلب قبل الجدم گام وتلگاكم) ... يزوار الحسين
السمه تتمنه لو فوگاها ممشاكم ... يزوار الحسين
الأرض تتباهه واتنادي علي اوياكم ... يزوار الحسين

نحن لا نسأل من أنت ولا تسكن أين
بفخار سننادي نحن عشاق الحسين

العشگ جامعهم ... تحت فد رايه
الشرق والمغرب ... إجت مشايه
نحن في خدمتكم طول السنين
يا هلا بيكم يزوار الحسين
****
الملائكة العرش أصوات تتعاله ... يزوار الحسين
مشيكم هذا عين الباري تبراله ... يزوار الحسين
المشه خطوه ابطريق احسين هنياله ... يزوار الحسين
ضمن ختم الشفاعه ابصفحة اعماله ... يزوار الحسين

خطوات هي في درب الصراط المستقيم
من مشاها فهو عند الله ذو حظ عظيم

الحسين ايوحد ... جميع اقلوبنا
ملايين احنه ... وفرد محبوبنا
وحد العالم يوم الأربعين
يا هلا بيكم يزوار الحسين
****
شباب وشيب متحزمين للخدمه ... يزوار الحسين
نعيش انموت فدوه الدرب أبو اليمه ... يزوار الحسين
طفلنا ابكل براءه ردد الكلمه ... يزوار الحسين
يرب محمود مشكور اعله هالنعمه ... يزوار الحسين

لقب الخادم عز ، شرف في كربلاء
وعلى كل الملا فيه تباهى النبلاء

نذر للخدمه ... العمر واسنينه
شرف خدمتكم ... فخر يكفينه
كل عام في طريق العاشقين
يا هلا بيكم يزوار الحسين
****
عمر فاروق البدراوي
١٧-٦-٢٠١٩
كربلاء المقدسة